चाडपर्व नजिकिँदै गर्दा सहुलियत दरमा चामल बिक्री
प्रतीक्षा आले
खाद्य व्यवस्था तथा व्यापार कम्पनी लिमिटेड गोरखा शाखाले नजिकिँदै गरेको चाडपर्वलाई लक्षित गरी सहुलियत दरमा चामल बिक्री गर्न सुरु गरेको छ । दशैं–तिहारलाई लक्षित गरी शाखाले चामलमा साविकभन्दा ५ रुपैँया मूल्य घटाएर सहुलियत मूल्यको चामल बिक्री गर्न थालेको खाद्य व्यवस्था कार्यालयकी प्रमुख रञ्जना केसीले बताइन् । कार्यालयको वार्षिकउत्सवको अवसर पारेर साउन २८ गतेबाट नै सहुलियतको चामल बिक्री सुरु गरेको उनले जानकारी दिइन् ।
उनका अनुसार कार्यालयबाट स्टिम जिरा मसिना र अरुवा सोना मन्सुली चामल छुट मूल्यमा बिक्री हुँदै आएको छ । यस वर्षका लागि कार्यालयको सदरमुकामस्थित डिपोमा ३८० क्वीन्टल, सिर्दिबास डिपोका लागि १९० क्वीन्टल तथा बिक्री केन्द्र नामरुङ र चुमलिङका लागि पनि १९०, १९० क्वीन्टल चामल छुट मूल्यमा बिक्री गर्न कोटा निर्धारण भएको थियो ।
जसअन्तरगत सदरमुकामस्थित डिपोबाट अरुवा सोना मन्सुली चामल प्रतिकेजी ६२ बाट घटेर ५७ रुपैँयामा बिक्री भैरहेको छ । यस्तै, स्टिम जिरा मसिनो चामल प्रतिकेजी रु ९२ बाट घटेर ८७ का दरले बिक्री गरिरहेको कार्यालय प्रमुख केसीले बताएकी छिन् ।
खाद्यको सिर्दिबास डिपो तथा बिक्री केन्द्र नामरुङ र चुमलिङबाट भने अरुवा सोना मन्सुली चामल प्रतिकेजी ६५ बाट घटेर ६० र स्टिम जिरा मसिनो चामल प्रतिकेजी रु ९५ बाट घटेर ९० का दरले बिक्री गरिरहेको कार्यालय प्रमुख केसीको भनाइ छ । केसीका अनुसार छुट कोटाको मौज्दात नसकिएसम्म बिक्री केन्द्रहरुबाट सहुलियतको चामल उपलब्ध हुन्छ । छुट कोटाको मौज्दात सकिएपछि भने पुरानै दरमा चामल खरिद बिक्री हुने उल्लेख छ ।
‘छुट कोटामा २५ केजी बोराको अरुवा सोना मन्सुली चामल गोरखामा प्रतिबोरा रु १४ सय २५ र सिर्दिबासमा प्रतिबोरा रु १५०० तथा स्टिम जिरा मसिनो चामल गोरखामा प्रतिबोरा रु २१ सय ७५ र सिर्दिबासमा प्रतिबोरा रु २२ सय ५० मा बिक्री गरिरहेका छौँ’, उनले भनिन्, ‘छुट कोटा सकिएपछि प्रतिकेजी ५ रुपैँया बढि तिरेर बजार मूल्यभन्दा सस्तोमा नै चामल बिक्री वितरण हुन्छ ।’
दशैँ, तिहारलाई लक्षित गरेर कार्यालयले चिनी, दाल, तेल र गेडागुडी समेत बिक्री गर्न लागेको कार्यालय प्रमुख रन्जना केसीले जानकारी दिइन् । ‘केही दिनभित्र चिनी लगायत अन्य खाद्यन्न बिक्री गर्न सुरु गर्छौँ । चिनी प्रतिकेजी ११० रुपैँयामा उपलब्ध हुन्छ’, उनले भनिन् ।
चालु आर्थिक वर्ष २०८३/०८४ का लागि खाद्यको सिर्दिबास डिपो, नाम्रुङ बिक्री केन्द्र तथा चुम्लिङ बिक्री केन्द्रका लागि एक, एक हजार क्वीन्टल चामलको कोटा निर्धारण भएको छ । शाखा कार्यालय गोरखाको लागि भने आवश्यकता अनुसार चामल ढुवानी हुने बताइएको छ ।
कार्यालयको सिर्दिवास डिपोमा हाल सातसय क्वीन्टल चामल मौज्दात रहेको खाद्य व्यवस्था तथा व्यापार कम्पनी लिमिटेड गोरखा शाखाले जनाएको छ ।
