गोरखामा उभिएर रविन्द्र मिश्रले भने : पृथ्वीनारायण शाह साम्राज्यवादी होइनन्, राष्ट्र निर्माता हुन्
साझा पार्टीका केन्द्रीय संयोजक रवीन्द्र मिश्रले शनिबार गोरखाको एक सभामा भने, ‘गोरखाले नेपाल जन्माएको हो । गोरखाले जन्माएको पुर्खाहरुले छात्तिमाथि नेपाल बोकेर हिडे । तर तपाईँ र मेरो पुस्ताचाहिँ नेपालको छात्तिमाथि आफ्नो स्वार्थ र कुण्ठा बोकेर परेड खेलिरहेका छौं । यो अत्यन्त दुखद कुरा हो । त्यति मात्र होइन, हामी जो जो पुर्खाले छात्तिमा नेपाल बोकेर हिडे, तिनलाई साम्रज्यवादीको संज्ञा दिन्छौं । पृथ्वीनारायण शाहलाई कतिपयले साम्राज्यवादी भनेर सत्तोसराप गरे । होइन, पृथ्वीनारायण शाह नेपाल एकीकरणका नायक हुन् । साम्राज्यवादी होइनन् । जसले उनलाई साम्राज्यवादी भन्छन्, तिनले विश्वको इतिहास पढेका छैनन् । विश्वको जुनसुकै देशको इतिहास पढ्दा कसै न कसैले त्यो देशलाई एकीकरण गरेको हुनुपर्छ, कसै न कसैले त्यो देशको सीमारेखा कोरेको हुनुपर्छ । पृथ्वीनारायण शाहले त्यही गरेका हुन् ।’ राजनीतिक स्वार्थ पूर्र्र्र्र्र्र्र्र्र्र्र्र्र्र्र्र्र्र्र्ति गर्न कतिपयले विदेशीको इशारामा जातीयताको नारा, क्षेत्रीयताको नारा, धार्मिक नारा लगाउनेहरुले पृथ्वीनारायण शाहलाई सरापेको उनले तर्क गरे ।
अर्को फरक प्रसंगमा बोल्दै नेता मिश्रले कर्मचारी युनियनले प्रशासन यन्त्रलाई कामै गर्न नदिएको भन्दै यिनलाई खारेज गर्नुपर्ने चेतावनी दिएका छन् । साझा पार्टीको गोरखा संयोजक घोषणा सभामा बोल्दै नेता मिश्रले कर्मचारी युनियन, शिक्षक युनियन, प्राध्यापक युनियनहरु सबैलाई खारेज गर्नुपर्र्ने बताए ।
‘यो देशको प्रशासन यन्त्रलाई कामै गर्न नदिने भनेको कर्मचारी युनियनले हो’, उनले भने, ‘त्यसैले यदि हामी सरकारमा आयौं भने सबै कर्मचारी युनियनलाई खारेज गर्नेछौं ।’ कर्मचारी युनियनले आफू र नेताको काम मात्र गर्ने, राष्ट्रको काम नगर्ने गरेको उनको आरोप छ । ‘सर्वसाधारण नेपालीले तिरेको राजस्वबाट तलब खाएका एकजना नासु, एकजना खरदारले कर्मचारी युनियनको बलमा सचिवको टेबुल ठटाएर, सचिवलाई कालोमोसो लगाएर अनैतिक काम गर्न दबाब दिइरहेका हुन्छन् । यसरी कसरी प्रशासन संयन्त्र चल्छ ?’, उनले भने, ‘त्यसैले यदि हामी सरकारमा आयौं भने, हामी राजनीतिक दलका शुभेच्छुक संगठन, भातृसंगठनका रुपमा रहेका सबै कर्मचारी युनियन, सबै शिक्षक युनियन, प्राध्यापक युनियन खारेज गर्छौं । बल्ल सुशासन सुरु हुन्छ ।’ कर्मचारीतन्त्रभित्र आफ्नो मान्छे भए मात्र काम हुने गरेको, नेता, बिचौलिया र बोलवाला भएकाहरुको काम हुने गरेको तर सर्वसाधारणको काम गर्न अत्यन्तै कठिन हुने गरेको उनले तर्क गरे ।
सोही सभामा बोल्दै नेता मिश्रले २०४६ सालदेखि यताका नेपालका सबै नेता, उच्च पदस्थ कर्मचारीहरुको सम्पत्ति छानबीन गर्नुपर्नेमा जोड दिए । ‘नेपाल पछाडि पर्नुको कारण के हो भने नेपालमा सीमित नेता, बिचौलिया, उच्चपदस्थ कर्मचारीको स्तर निरन्तर उकासिइरहेको छ’, उनले भने, ‘नेपाललाई साँच्चिकै बदल्ने हो भने भ्रष्टाचार नियन्त्रण गर्नुपर्छ । हामी यदि सरकारमा आयौं भने २०४६ साल यता राजनीतिक, प्रशासनिक र अन्य उच्च नेतृत्वमा रहेका सबैको हामी सम्पत्ति छानबीन गर्छौं ।’
नेपाली राजनीति सुध्रिने बाटोमा नरहेको नेता मिश्रको तर्क छ । ‘बिगत ३० बर्ष, ४० बर्ष तपाईँले जसरी बिताउनु भयो, यदि यही पार्टीले देश चलाइरहे भने अझै पनि देश सुध्रिनेवाला छैन । मृत्यूशैयामा पुगेपनि मुलुक बदलिनेवाला छैन’, उनले भने ‘यो देशको राजनीति तबमात्र सुध्रिन्छ, जब नेपाली नेता मात्र होइन, नेपाली नागरिक पनि बदलिन्छन् । खराबहरु नेताहरु सिँहदरबारमा बसेर शासन चलाउने, असल नागरिकहरु छेउमा बसेर हेरिदिने परम्परा रहुञ्जेल यो देश बदलिँदैन ।’ नागरिकहरु अहिले देश चलाइरहेका राजनीतिक पार्टीको मायाजालमा फँसेकाले देश नबनेको उनको भनाइ छ ।
शुक्रबार आयोजित समारोहका बीच साझा पार्टी गोरखाको संयोजकमा किशोर रेग्मी चयन भएका छन् ।
