‘एक घर एक धारा’ कार्यक्रम अन्तरगत गोरखामा ३३ हजार धारा जडान
गण्डकी प्रदेश सरकारले सुरु गरेको ‘एक घर एक धारा’ कार्यक्रम अन्तरगत गोरखामा ३३ हजार भन्दा धेरै घरहरुमा खानेपानीका धारा जडान भएका छन् । खानेपानी तथा सरसफाई डिभिजन कार्यालय गोरखाार्फत आर्थिक वर्ष २०८०÷८१ सम्ममा जिल्लाभर ३३ हजार २१५ वटा धाराहरु जडान भएका थिए ।
जिल्लाको कूल लाभग्राहीमध्य यो ९१.५ प्रतिशत हो । कार्यक्रम लागु भएको पाँचबर्षको अवधिमा उल्लेख्य प्रगति भएको कार्यालयले जनाएको छ । चालु आर्थिक वर्ष जिल्लामा थप पाँचसय बढी पानीका धाराहरु जडान भएका कार्यालयका सव–इन्जिनियर दिपक खनालले बताए । ‘हामीले गोरखा र लमजुङको कार्यक्रम हेर्ने गर्दछौँ । चालु आवमा दुवै जिल्लाका लागि ९१५ वटा पानीको धारा जडान गर्ने कार्यक्रम आएको थियो ।
जसमध्य करिब तीन सय पानीको धाराहरु लमजुङमा जडान भएका छन् भने बाँकी गोरखामा जडान भएका हुन्’, उनले भने ।
एक घर एक धारा कार्यक्रमका लागि कार्यालयमा चालु आर्थिक वर्ष ३० करोड ३० लाख रुपैँया बजेट आएको उनले जानकारी दिए । उक्त रकमबाट दुवै जिल्लामा कार्यक्रम संचालन गरिएको सव–इन्जिनियर खनालले बताएका छन् ।
‘हालसम्म जिल्लाको ९१.५प्रतिशत जनसंख्यामा खानेपानीको पहुँच पुगेको छ’, उनले भने, ‘यो तथ्याङ्क अन्य जिल्लाहरुको तुलनाका धेरै राम्रो हो ।’ लम्जुङको आधारभूत खानेपानी पहुँच प्रतिशत भने ८५.८८ प्रतिशत रहेको र त्यहाँ हालसम्म करिब १९ हजार ४२० वटा खानेपानीको धाराहरु जडान् भइसकेको उनको भनाइ छ ।
कार्यालयले पानीको धाराहरु नभएका ठाउँमा धारा निर्माण गर्ने र धारा भएका ठाउँहरुमा मर्मत सम्भारको काम गर्ने गरेको छ । तर, पानीको स्रोत सुनिश्चितताको जिम्मा भने आफूहरुले नरहेको खानेपानी तथा सरसफाई डिभिजन कार्यालय गोरखाका प्रमुख तुल्सी बस्नेतले बताए । ‘पानीको स्रोत सुनिश्चितता र मुल दर्ताको काम भने स्थानीय सरकारको हो’, बस्नेतले भने, ‘हाम्रो कार्यालयले आयोजना निर्माणको काम मात्र हेर्छ ।’
जिल्लामा आर्थिक वर्ष २०७५/७६ देखि एक घर एक धारा अभियान सुरु भएको थियो । अभियानको हालसम्मको प्रगति विवरण ९१.५ प्रतिशत छ । अभियान अन्तरगत पानीको धारा निर्माणको काम लगभग सम्पन्न भएता पनि मर्मत सम्भार र नयाँ आयोजनाका कामहरु निरन्तर रुपमा संचालन हुने खानेपानी तथा सरसफाई डिभिजन कार्यालय गोरखाले जनाएको छ ।
