नगरपालिका स्तरीय अन्तर मावि निवन्ध प्रतियोगितामा ओल्ड क्यापिटलकी अर्याल उत्कृष्ट
गोरखा नगरपालिका–७ नयाँबजारको हिमचुली बचत तथा ऋण सहकारी संस्थाको आयोजनामा भएको गोरखा नगरपालिका स्तरीय अन्तर मावि निवन्ध प्रतियोगितामा द ओल्ड क्यापिटल मावि रानीवनकी प्रशिद्धिका अर्याल प्रथम भएकी छन् ।
संस्थाको ३१ औँ स्थापना दिवसको सन्दर्भ पारेर आइतवार आयोजित प्रतियोगितामा सरस्वती मावि आहालेकी कृतिका लामिछाने दोस्रो, महालक्ष्मी मावि लक्ष्मीबजारकी अञ्जना श्रेष्ठ तेस्रो र महेन्द्र मावि कुन्दुरटारकी काजल कुमाल सान्त्वना भएका छन् ।
प्रतियोगिताका बिजेताहरुलाई फागुन १५ गते पुरस्कार वितरण हुने संस्थाका अध्यक्ष रामबाबु श्रेष्ठले बताए । ‘आर्थिक समृद्धिमा बचत तथा ऋण सहकारी’ भन्ने बिषयमा भएको प्रतियोगितामा नगर क्षेत्रभित्रका आठ वटा माविका विद्यार्थी सहभागी थिए ।
विद्यार्थीको क्षमता अभिवृद्धिका लागि तथा बालबालिकामा सहकारी र वित्तीय संस्थाको अवधारणा बसाल्न संस्थाले वक्तृत्वकला, हाजिरीजवाफ जस्ता बिभिन्न प्रतियोगिता गर्दै आएको श्रेष्ठले जानकारी दिए । संस्थाले प्रत्येक बर्ष २२ जना विद्यार्थीलाई छात्रवृत्ति समेत प्रदान गर्दै आएको बताइएको छ ।
