प्रथम अन्तर मावि वक्तृत्वकला प्रतियोगितामा महालक्ष्मीकी आकृति पहिलो
२११ औँ भानु जयन्तीको अवसरमा आयोजित प्रथम अन्तर मावि वक्तृत्वकला प्रतियोगितामा महालक्ष्मी मावि लक्ष्मीबजारकी छात्रा आकृति उपरकोटी पहिलो भएकी छन् । उनले ५० हजार नगद पुरस्कारको साथमा शिल्ड, मेडल र प्रमाणपत्र प्राप्त गरेकी छन् ।
ग्लोबल गोरखा समाजको आयोजनामा शनिवार जिल्ला सदरमुकाममा भएको ‘राष्ट्र निर्माणमा गोरखाको योगदान, विगतदेखि वर्तमान’ विषयक वक्तृत्वकला प्रतियोगितामा जनशक्ति मावि नाम्जुङकी आरिया गोतामे दोस्रो र भिमोदय मावि आरुघाटका प्रदिप विश्वकर्मा तेस्रो भएका छन् ।
उनीहरुले क्रमश ३५ हजार र २० हजार नगद पुरस्कारको साथमा शिल्ड, मेडल र प्रमाणपत्र प्राप्त गरेको समाजका उपसंयोजक इन्द्रराज भट्टले बताए । प्रतियोगितामा जनकल्याण मावि सिरानचोककी सरस्वती नेपाली र धर्मोदय मावि पालुङटारका सामूयल श्रेष्ठ सान्त्वना भएका छन् । उनीहरुलाई जनही दश हजार नगद पुरस्कार प्रदान गरिएको भट्टले जानकारी दिए । प्रतियोगितामा जिल्लाका दश स्थानीय तहका १९ वटा विद्यालयहरुको सहभागीता रहेको थियो ।
प्रत्येक स्थानीय तहबाट दुई जनाका दरले (एक जना छात्रा अनिवार्य) कार्यक्रममा सहभागी हुन आयोजकले आग्रह गरेको थियो । प्रतियोगितामा चुमनुव्री वाहेक अन्य स्थानीय तहका १९ जना बिद्यार्थीको सहभागिता रहेको थियो । ९ देखि १२ कक्षासम्म अध्ययनरत बिद्यार्थीहरु प्रतियोगितामा सहभागी थिए । समाजका नेपाल संयोजक यदु लामिछानेको अध्यक्षतामा भएको कार्यक्रममा जिल्ला समन्वय समितिकी उपप्रमुख लिला परियार, गोरखा नगरपालिकका प्रमुख कृष्ण राना, उपप्रमुख मसली माया थोकर लगायतको उपस्थिति रहेको थियो ।
